ပြည်သူ့အင်အားဦးစီးဌာန၊ လူဦးရေပြောင်းလဲခြင်းစာတမ်းထုတ်ပြန်

Write By: admin Published In: Latest News Created Date: 2016-12-23 Hits: 1210 Comment: 0

နေပြည်တော်၊ ဒီဇင်ဘာ  ၂၃ ရက်

ပြည်ထောင်စုသမ္မတမြန်မာနိုင်ငံတော်အစိုးရ 

အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန

  ပြည်သူ့အင်အားဦးစီးဌာန 

သတင်းထုတ်ပြန်ချက် 

နေပြည်တော်၊ ဒီဇင်ဘာ  ၂၃ ရက်

 

          ပြည်သူ့အင်အားဦးစီးဌာနသည် ၂၀၁၄ ခုနှစ် လူဦးရေနှင့်အိမ်အကြောင်းအရာ သန်းခေါင်စာရင်းအစီရင်ခံစာများကို အတွဲလိုက်ထုတ်ပြန်ကြေညာခဲ့ရာ ပထမအဆင့်အနေဖြင့် ရှေ့ပြေးလူဦးရေစာရင်းကို ၂၀၁၄ ခုနှစ် သြဂုတ်လတွင်လည်းကောင်း၊ သန်းခေါင်စာရင်း ပင်မအစီရင်ခံစာများကို ၂၀၁၅ ခုနှစ် မေလတွင်လည်းကောင်း၊ အလုပ်အကိုင်နှင့်လုပ်ငန်းအစီရင်ခံစာကို ၂၀၁၆ ခုနှစ် မတ်လတွင် လည်းကောင်း၊ ကိုးကွယ်သည့်ဘာသာ အစီရင်ခံစာကို ၂၀၁၆ ခုနှစ် ဇူလိုင်လတွင် လည်းကောင်းထုတ်ပြန်ကြေညာခဲ့ပါသည်။

          ပြည်သူ့အင်အားဦးစီးဌာနသည် ၂၀၁၄ ခုနှစ် သန်းခေါင်စာရင်း အချက်အလက်များကို အခြေခံ၍ အသေးစိတ်ဆန်းစစ်လေ့လာသည့် သုတေသနစာတမ်း (၁၃) စောင်နှင့် သန်းခေါင်စာရင်းရလဒ် မြေပုံများကို ဆက်လက်ပြုစုလျက်ရှိပြီး မွေးဖွားခြင်းနှင့် လက်ထပ်ထိမ်းမြားခြင်း၊ သေဆုံးခြင်းနှင့် သားဖွား မိခင်သေဆုံးခြင်းဆိုင်ရာ အသေးစိတ်သုတေသနစာတမ်းများကို ၂၀၁၆ ခုနှစ် စက်တင်ဘာလ (၇) ရက်နေ့တွင် ထုတ်ပြန်ကြေညာခဲ့ပါသည်။ ထုတ်ပြန်ကြေညာပြီးသည့် အစီရင်ခံစာများနှင့် သုတေသနစာတမ်းများကို ပြည်သူ့အင်အားဦးစီးဌာန၏ ဝက်ဘ်ဆိုဒ် www.dop.gov.mm တွင် လွှင့်တင်ထားပါသည်။

  ယခု ပြည်သူ့အင်အားဦးစီးဌာန ဝက်ဘ်ဆိုဒ်တွင် ထုတ်ပြန်လွှင့်တင်သည့် လူဦးရေပြောင်းလဲခြင်းစာတမ်းတွင် မြန်မာနိုင်ငံ၏ လူဦးရေပြောင်းလဲခြင်းဆိုင်ရာ တွေ့ရှိချက်များ၊ အဆိုပါပြောင်းလဲမှုဖြစ်စဉ်၏ သက်ရောက်မှုများနှင့် မြန်မာနိုင်ငံအတွက် လူဦးရေဆုလာဘ်ကို ရရှိခံစားနိုင်စေမည့် နည်းလမ်းများကို အသေးစိတ်ဆန်းစစ်လေ့လာ၍ ရေးသားပြုစုထားပါသည်။

          မြန်မာနိုင်ငံတွင် လူငယ်လူရွယ်အရေအတွက် ကျဆင်းလာခြင်း၊ သက်ကြီးရွယ်အိုအရေအတွက် တိုးတက်လာခြင်းနှင့် အလုပ်လုပ်နိုင်သည့် လူဦးရေအချိုး မြင့်မားလာခြင်းတို့သည် လူဦးရေနှင့် အိမ်ထောင်စုများ၏ ဖွဲ့စည်းပုံ၊ အမျိုးအစားနှင့်အရွယ်အစားတို့ကို ပြောင်းလဲစေနိုင်ပါသည်။ အဆိုပါ လူဦးရေပြောင်းလဲမှုဖြစ်စဉ်ကြောင့် လုပ်သားဈေးကွက်နှင့် လူမှုဘဝလှုပ်ရှားမှုများတွင် အမျိုးသမီးများ ပိုမိုပါဝင်နိုင်ရန် အခွင့်အလမ်းများဖြစ်ပေါ်လာပြီး အမျိုးသမီးများ၏ အနေအထားကိုလည်း ပြောင်းလဲစေနိုင်ပါသည်။

        မြန်မာနိုင်ငံတွင် အလုပ်လုပ်နိုင်သည့်အရွယ် လူဦးရေများပြားနေခြင်းသည် စီးပွားရေးဖွံ့ဖြိုးတိုးတက်မှုအတွက် အခွင့်အလမ်းတစ်ရပ်ဖြစ်ပြီး အဆိုပါအခြေအနေသည် “လူဦးရေဆုလာဘ်” ရရှိခံစားနေရခြင်းပင် ဖြစ်ပါသည်။ လူဦးရေဆုလာဘ်ကို မိမိရရ အသုံးချနိုင်ရန်အတွက် မိသားစုစီမံကိန်း၊ ကျန်းမာရေး၊ ပညာရေး၊ အုပ်ချုပ်မှု၊ စီးပွားရေးနှင့် လုပ်သားဈေးကွက်တို့နှင့် သက်ဆိုင်သည့် စီမံကိန်းများကို နှိုင်းဆချင့်ချိန် ဆောင်ရွက်ရန် လိုအပ်ပါသည်။ ထို့အပြင် လုပ်သားဈေးကွက်တွင် အမျိုးသမီးများ၏ ပါဝင်လာမှုကို အပြည့်အဝအသုံးချနိုင်မည်ဆိုလျှင် မြန်မာနိုင်ငံတွင် “ကျား/မ ဆုလာဘ်” (Gender Dividend)ကိုပင် ဖန်တီးနိုင်မည် ဖြစ်ပါကြောင်းနှင့် ပြည်သူ့အင်အားဦးစီးဌာနမှ ကျန်ရှိသောအသေးစိတ်သုတေသနစာတမ်းများကိုလည်း ဆက်လက်ထုတ်ပြန်ပေးသွားမည် ဖြစ်ပါကြောင်း သတင်းထုတ်ပြန်အပ်ပါသည်။

 

Tags:

Same In Category

Related Blogs By Tags

Leave A Comment

Captcha