ပြည်သူ့အင်အားဦးစီးဌာန၊ ရွှေ့ပြောင်းသွားလာ ခြင်းနှင့် မြို့ပြထွန်းကားလာခြင်းစာတမ်း ထုတ်ပြန်

Write By: admin Published In: Latest News Created Date: 2017-01-10 Hits: 1277 Comment: 0

နေပြည်တော်၊ ဇန်နဝါရီလ  ၁၀ ရက်

ပြည်ထောင်စုသမ္မတမြန်မာနိုင်ငံတော်အစိုးရ 

အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန

  ပြည်သူ့အင်အားဦးစီးဌာန 

သတင်းထုတ်ပြန်ချက် 

နေပြည်တော်၊ ဇန်နဝါရီလ  ၁၀ ရက်

ပြည်သူ့အင်အားဦးစီးဌာနသည် ၂၀၁၄ ခုနှစ် လူဦးရေနှင့်အိမ်အကြောင်းအရာ သန်းခေါင် စာရင်း အစီရင်ခံစာများကို အတွဲလိုက် ထုတ်ပြန်ကြေညာခဲ့ရာ ပထမအဆင့်အနေဖြင့် ရှေ့ပြေး လူဦးရေစာရင်း ကို ၂၀၁၄ ခုနှစ် သြဂုတ်လတွင်လည်းကောင်း၊ သန်းခေါင်စာရင်း ပင်မအစီရင်ခံစာ များကို ၂၀၁၅ ခုနှစ် မေလတွင်လည်းကောင်း၊ အလုပ်အကိုင်နှင့်လုပ်ငန်းအစီရင်ခံစာကို ၂၀၁၆ ခုနှစ် မတ်လတွင်လည်းကောင်း၊ ကိုးကွယ်သည့်ဘာသာ အစီရင်ခံစာကို ၂၀၁၆ ခုနှစ် ဇူလိုင်လတွင် လည်းကောင်း ထုတ်ပြန်ကြေညာ ခဲ့ပါသည်။

         ယခုအခါ ၂၀၁၄ ခုနှစ် သန်းခေါင်စာရင်း အချက်အလက်များကို အခြေခံ၍ အသေးစိတ် ဆန်းစစ်လေ့လာသည့် သုတေသနစာတမ်း (၁၃) စောင်နှင့် သန်းခေါင်စာရင်းရလဒ် မြေပုံများကို ဆက်လက်ပြုစုလျက်ရှိပြီး မွေးဖွားခြင်းနှင့် လက်ထပ်ထိမ်းမြားခြင်း၊ သေဆုံးခြင်းနှင့် သားဖွားမိခင် သေဆုံးခြင်းဆိုင်ရာ အသေးစိတ်သုတေသနစာတမ်းများကို ၂၀၁၆ ခုနှစ် စက်တင်ဘာလ (၇) ရက်နေ့တွင် ထုတ်ပြန်ကြေညာခဲ့ပါသည်။ လူဦးရေပြောင်းလဲခြင်း အသေးစိတ် သုတေသန စာတမ်းကို ၂၀၁၆ ခုနှစ် ဒီဇင်ဘာလ (၂၃)ရက်နေ့တွင် ထုတ်ပြန်ကြေငြာခဲ့ပါသည်။ ထုတ်ပြန် ကြေညာပြီးသည့် အစီရင်ခံစာများနှင့် သုတေသနစာတမ်းများကို ပြည်သူ့အင်အားဦးစီးဌာန၏ ဝက်ဘ်ဆိုဒ် www.dop.gov.mm တွင် လွှင့်တင်ထားပါသည်။

          ယခု ပြည်သူ့အင်အားဦးစီးဌာန ဝက်ဘ်ဆိုဒ်တွင် ထုတ်ပြန်လွှင့်တင်သည့် ရွှေ့ပြောင်းသွားလာ ခြင်းနှင့် မြို့ပြထွန်းကားလာခြင်းစာတမ်းတွင် ပြည်တွင်းရွှေ့ပြောင်းသွားလာခြင်း၊ ပြည်ပရွှေ့ပြောင်း သွားလာခြင်း၊ မြို့ပြနှင့်ကျေးလက်ဒေသတွင် လူဦးရေပျံ့နှံ့နေထိုင်မှု(မြို့ပြထွန်းကားလာခြင်း) ဟူ၍ ရွှေ့ပြောင်းခြင်း ဖြစ်စဉ်(၃)မျိုးကို အသေးစိတ်ဆန်းစစ် လေ့လာ၍ ရေးသားပြုစုထားပါသည်။

          အဆိုပါစာတမ်းအရ မြန်မာနိုင်ငံတွင် လူ(၅)ဦးတွင် (၁)ဦးသည် ဘဝတစ်လျှောက်အနည်းဆုံး တစ်ကြိမ် ပြည်တွင်း၌ ပြောင်းရွှေ့ခဲ့ဖူးကြပြီး လွန်ခဲ့သည့်(၅)နှစ်အတွင်း ရွှေ့ပြောင်းသူ (၇)ရာခိုင်နှုန်း ရှိကြောင်းတွေ့ရှိပါသည်။ ပြည်တွင်းရွှေ့ပြောင်းသွားလာခြင်းသည် ရန်ကုန်တိုင်းဒေသကြီးကို မဏ္ဍိုင်ပြု နေပြီး ရန်ကုန်တိုင်းဒေသကြီးသို့ လွန်ခဲ့သည့်(၅)နှစ်အတွင်း ရွှေ့ပြောင်းလာကြသူ အများစုသည် ဧရာဝတီ တိုင်းဒေသကြီးမှ ဖြစ်ကြောင်း တွေ့ရပါသည်။

          မြန်မာနိုင်ငံတွင် မြို့ပြဒေသ၌ နေထိုင်သူဥင်္ီးရေမှာ နိုင်ငံလူဦးရေ၏ (၃၀) ရာခိုင်နှုန်းခန့်သာ ရှိပြီး နိုင်ငံပိုမိုဖွံ့ဖြိုးတိုးတက်လာသည်နှင့်အမျှ မြို့ပြထွန်းကားလာမှုနှင့် မြို့ပြကြီးထွားလာမှုတို့ လျှင်မြန်စွာ ဖြစ်ပေါ်လာမည်ဟု မျှော်လင့်ရပါသည်။ လက်ရှိအခြေအနေအရ မြို့ပြထွန်းကားလာမှု သည် ရန်ကုန်တိုင်းဒေသကြီး(အထူးသဖြင့်ရန်ကုန်မြို့)တွင် မြင့်မားစွာဖြစ်ပေါ်နေပြီး ယင်းသို့ ဖြစ်ရခြင်းမှာ ရန်ကုန်သည် အလုပ်အကိုင်အခွင့်အလမ်းများ ပေးနိုင်သည့် နေရာတစ်ခုသဖွယ် ဖြစ်နေခြင်းကြောင့်ဟု သုံးသပ်ရပါသည်။ ထို့ကြောင့်ရန်ကုန်မြို့အပြင် အခြားနေရာဒေသများတွင် လည်း အလုပ်အကိုင်အခွင့်အလမ်းများ ပေါများလာစေရန် ကြိုးပမ်းဆောင်ရွက်ရမည်ဖြစ်ပြီး ထိုဒေသများ၏ အလုပ်အကိုင်အခွင့်အလမ်းနှင့် ပတ်သက်သည့် သတင်းအချက်အလက်များကို ကျယ်ကျယ်ပြန့်ပြန့် သိရှိနိုင်ရေးအတွက် အလေးထားဆောင်ရွက်သွားရန် လိုအပ်မည်ဖြစ်ပါကြောင်း နှင့် ကျန်ရှိသော အသေးစိတ်သုတေသနစာတမ်းများကိုလည်း ပြည်သူ့အင်အားဦးစီးဌာနမှ ဆက်လက် ထုတ်ပြန် ပေးသွားမည်ဖြစ်ပါကြောင်း သတင်းထုတ်ပြန်အပ်ပါသည်။

Tags:

Same In Category

Related Blogs By Tags

Leave A Comment

Captcha