မြန်မာနိုင်ငံ၏ လူဦးရေသည် ၂၀၅၀ ခုနှစ်တွင် (၆၅)သန်းခန့်ဖြစ်လာမည်။

Write By: admin Published In: Latest News Created Date: 2017-03-28 Hits: 807 Comment: 0

နေပြည်တော်၊ မတ်လ (၂၄)ရက်

                     အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်သူ့အင်အား ဦးစီးဌာနသည် ၂၀၁၄ ခုနှစ် လူဦးရေနှင့် အိမ်အကြောင်းအရာ သန်းခေါင်စာရင်းအချက်အလက်များကို အခြေခံ၍ လူဦးရေခန့်မှန်းခြင်း သုတသေနစာတမ်းကို ယနေ့ထုတ်ပြန်ကြေညာလိုက်ပါသည်။ အဆိုပါစာတမ်းတွင် ပြည်ထောင်စု၊ မြို့ပြနှင့်ကျေးလက်အဆင့် လူဦးရေကို ၂၀၁၅ ခုနှစ်မှ ၂၀၅၀ ခုနှစ် အထိလည်းကောင်း၊ တိုင်းဒေသကြီး/ပြည်နယ်အဆင့်ကို ၂၀၁၅ ခုနှစ်မှ ၂၀၃၁ ခုနှစ်အထိ လည်းကောင်း ခန့်မှန်းတွက်ချက်ထားသည်။ မြန်မာနိုင်ငံ၏ လူဦးရေကို လူဦးရေတိုးနှုန်း အနိမ့်၊ အလယ်အလတ်နှင့် အမြင့်စသည့် အဆင့်(၃)ဆင့်ဖြင့် ခန့်မှန်းတွက်ချက်ထားပြီး အလယ် အလတ်အဆင့် ခန့်မှန်းတွက်ချက်မှုအရ မြန်မာနိုင်ငံ၏ လူဦးရေသည် ၂၀၅၀ ခုနှစ်တွင် (၆၅.၀) သန်းခန့်ရှိလာမည်ဖြစ်ကြောင်းသိရပါသည်။

          တိုင်းဒေသကြီး/ပြည်နယ်အလိုက် ၂၀၁၅ ခုနှစ်မှ ၂၀၃၁ ခုနှစ်အတွက် လူဦးရေကို တိုးနှုန်း အလယ်အလတ်အဆင့်ဖြင့် ခန့်မှန်းတွက်ချက်ရာတွင် ရန်ကုန်တိုင်းဒေသကြီးသည် ၂၀၃၁ ခုနှစ်၌ လူဦးရေ (၁၀.၅) သန်းခန့် နှင့် မန္တလေးတိုင်းဒေသကြီးတွင် လူဦးရေ (၇.၂) သန်းခန့် ရှိလာမည်ဖြစ်သည်။ ရန်ကုန်တိုင်းဒေသကြီး၊ ကယားပြည်နယ် ၊ ကချင်ပြည်နယ်တွင် နေပြည်တော်နှင့် ရှမ်းပြည်နယ်တို့သည် လူဦးရေတိုးပွားမှု မြင့်မားသော ဒေသများဖြစ်လာပြီး ဧရာဝတီတိုင်းဒေသကြီင်္း၊ မကွေးတိုင်းဒေသကြီးနှင့် မွန်ပြည်နယ်တို့သည် လူဦးရေတိုးပွားမှုအနည်းဆုံး ဒေသများဖြစ်လာနိုင်ကြောင်းနှင့် ကျန်တိုင်းဒေသကြီး/ ပြည်နယ်များတွင် လူဦးရေတိုးပွားမှု ပုံမှန်သာရှိမည် ဖြစ်ကြောင်း ခန့်မှန်းရရှိသည်။

          ဤစာတမ်းကိုလေ့လာခြင်းအားဖြင့် အနာဂတ်တွင် မြန်မာနိုင်ငံ၌ ဖြစ်ပေါ်လာမည့် လူဦးရေ အရွယ်အစား၊ ဖွဲ့စည်းပုံနှင့် ကျား/မ အချိုးစသည်တို့ကို သိရှိနိုင်မည်ဖြစ်ပါသည်။ ထို့ပြင် နိုင်ငံတော်အဆင့် မူဝါဒများချမှတ်ခြင်း၊ သယံဇာတနှင့် အရင်းအမြစ်များကို စီမံခန့်ခွဲခြင်း၊ သယ်ယူပို့ဆောင်ရေး၊ ကျန်းမာရေး၊ ပညာရေးနှင့်အခြားဝန်ဆောင်မှုလုပ်ငန်းများနှင့် သုတေသန လုပ်ငန်းများတွင် အထောက်အကူ ဖြစ်စေနိုင်ပါသည်။ သန်းခေါင်စာရင်း ဆိုင်ရာထုတ်ပြန်မှုများ နှင့်ပတ်သက်ပြီး အသေးစိတ်သိရှိလိုသည်များကို ပြည်သူ့အင်အားဦးစီးဌာန ဝက်ဘ်ဆိုဒ် www.dop.gov.mm တွင် ဝင်ရောက်လေ့လာနိုင်ကြောင်း သတင်းရရှိပါသည်။

Tags:

Same In Category

Related Blogs By Tags

Leave A Comment

Captcha